ဒီပဲယင်းမြို့အနီး ဒေါ်အောင်ဆန်းစုကြည်၏ ယာဉ်တန်း တိုက်ခိုက်ခံခဲ့ရသည့် နေရာ (ဓာတ်ပုံ-ရန်ကုန်မြို့၊ အမေရိကန်သံရုံး)
ဒေါ်အောင်ဆန်းစုကြည် အင်းစိန်ထောင်သို့ ရောက်ရှိနေခြင်းမှာ ဤအကြိမ်သည် ပထမအကြိမ် မဟုတ်ပေ။ ၂ဝဝ၃ ခုနှစ်ကလည်း ဒီပဲယင်းမြို့ တိုက်ခိုက်မှု အပြီး အင်းစိန်ထောင်တွင် အထိန်းသိမ်းခံရဖူးသည်။
ထိုနှစ် မေလ ၃ဝ ရက်နေ့ညက ဒေါ်အောင်ဆန်းစုကြည်နှင့် အဖွဲ့ချုပ် အဖွဲ့ဝင်များကို တင်ဆောင်လာသော မော်တော်ယာဉ်တန်းသည် စစ်ကိုင်းတိုင်း ဒီပဲယင်းမြို့ပြင်တွင် တုတ်၊ ဓား စသည့် လက်နက်မျိုးစုံ ကိုင်ဆောင် စောင့်ဆိုင်း နေသော လူအုပ်ကြီး၏ တိုက်ခိုက်မှုကို ခံခဲ့ရကြောင်း မျက်မြင် သက်သေများက ပြောသည်။
ကားမှန်များ ကွဲသွားသည့် အချိန်တွင် ယာဉ်မောင်းသူ ကိုကျော်စိုးလင်းက သူ၏ ကိုယ်ပိုင်ဆုံးဖြတ်ချက်ဖြင့် လူအုပ် အတွင်းမှ မောင်းထွက်သွားသဖြင့် ဒေါ်အောင်ဆန်းစုကြည်သည် ထိုသတ်ကွင်းအတွင်းမှ လွတ်မြောက်သွားခဲ့သည်။
“ကားထဲကို တုတ်၊ ဓားတွေနဲ့ပစ်လို့ ကျနော်တောင်မှ ခေါင်းကွဲသွားသေးတယ်” ဟု ကိုကျော်စိုးလင်းက ပြောသည်။
သံဆူးကြိုး အရံအတားများကို ဖောက်ထွက်အပြီး ဝင်ရောက် တိုက်ခိုက်လာသော ဒိုင်နာကား ၂ စီးကိုလည်း ရှောင်ထွက်ခဲ့ကြောင်း၊ ထို့ပြင် ရေဦးမြို့သို့ သွားသည့် လမ်းတွင် စောင့်နေသော ရဲတပ်ဖွဲ့ဝင်များ၊ စစ်သားများကိုလည်း ဖောက်ထွက် နိုင်ခဲ့ကြောင်း ကိုကျော်စိုးလင်းက ပြောသည်။ သေနတ်သံများ ထွက်ပေါ် လာသော်လည်း ဒေါ်အောင်ဆန်းစုကြည်တို့ကို ကျည်ဆန် ထိမှန်ခြင်း မရှိဟု ဆိုသည်။
“ရေဦးမြို့ ရောက်တော့ ဒေါ်အောင်ဆန်းစုကြည်ကို ခေါ်တယ်၊ သူက မလိုက်ဘူး၊ သတ်ချင်ရင်လည်း ကျမတို့ တဖွဲ့လုံးကို သတ်ပစ်လိုက်ပါ၊ ဥပဒေအတိုင်း ဆောင်ရွက်မှသာလျှင် ကျမ တယောက်တည်း လိုက်ခဲ့မယ်လို့ ပြောတယ်” ဟု ကိုကျော်စိုးလင်းက ကြုံတွေ့ခဲ့ရသည်များကို ပြောပြသည်။
ဒေါ်အောင်ဆန်းစုကြည်၏ ယာဉ်တန်းကို တိုက်ခိုက်ခဲ့သူများ၏ အရေအတွက်မှာ ထောင်ပေါင်းများစွာ ရှိသည်ဟု မျက်မြင် သက်သေများက သတင်းဌာနများကို ပြောပြကြသည်။ အာဏာပိုင်တို့ကလည်း ထိုအရေအတွက်ကို အတည်ပြုထားသည်။
“ဒီပဲယင်း မရောက်မီ နှစ်မိုင်ခန့်အကွာ မြို့အဝင်တွင် ဒေါ်စုကြည်အား ကန့်ကွက် ဆန္ဒပြရန် စောင့်နေသည့် လူ အင်အား (၅ဝဝဝ)ခန့် ရှိသည့် လူစုလူဝေးနှင့် ကြုံတွေ့ခဲ့ရကြောင်း”ဟု တိုက်ခိုက်မှု အပြီး နောက်တနေ့တွင် ပြုလုပ်သည့် သတင်းစာ ရှင်းလင်းပွဲတွင် အာဏာပိုင်တို့က ပြောကြားခဲ့သည်။ လူ ၄ ဦး သေဆုံးပြီး ၅ဝ ခန့် ဒဏ်ရာရသွားသည်ဟု ဆိုသည်။ မျက်မြင်သက်သေများကမူ ထိုထက်မက သေဆုံး၊ ဒဏ်ရာရမှုများ ရှိသည်ဟု ပြောကြသည်။
ထိုဖြစ်ရပ် မဖြစ်ပွားမီ တလအလိုတွင် ဒေါ်အောင်ဆန်းစုကြည်က မြန်မာပြည်အနှံ့ သွားရောက်ခဲ့သည့် သူ၏ ခရီးစဉ်အတွင်း ရန်လိုမှုများနှင့် ကြုံခဲ့ရသည်ဟု သတင်းထောက်များကို ပြောပြသည်။
“ဒေသခံ အာဏာပိုင်တွေက နိုင်ငံတော်အဆင့် အာဏာပိုင်တွေရဲ့ သဘောတူချက် ဒါမှမဟုတ် အနည်းဆုံးတော့ နားလည်မှုနဲ့ ခွင့်ပြုချက် ရှိတယ်လို့ မထင်ရင် သူတို့ လုပ်ခဲ့တာတွေကို လုပ်ရဲမှာ မဟုတ်ဘူး” ဟု သတင်းထောက်များကို ပြောခဲ့ဖူးသည်။
ဒီပဲယင်း လုပ်ကြံမှုအပြီး ကုလသမဂ္ဂ လူ့အခွင့်အရေး အထူး ကိုယ်စားလှယ် မစ္စတာ ပေါ်လို ဆာဂျီယို ပီညဲရိုးက မြန်မာနိုင်ငံသို့ သွားရောက် လေ့လာပြီးနောက် ပြစ်မှု ကျူးလွန်သူများကို တရားစွဲဆိုခြင်း မရှိဘဲ တိုက်ခိုက်ခံခဲ့ရသူများသာ ထောင်ထဲရောက်သွားကြောင်း သုံးသပ်လိုက်သည်။
ကုလသမဂ္ဂ အထွေထွေ ညီလာခံသို့ ထိုနှစ် နိုဝင်ဘာလတွင် တင်သွင်းသည့် သူ၏ အစီရင်ခံစာတွင် “အစိုးရ အာဏာပိုင်များက ကြံစည် ဆောင်ရွက်တာမျိုး မဟုတ်လျှင် ဒီပဲယင်း ဖြစ်ရပ် ဖြစ်ပွား နိုင်စရာ မရှိဘူး ဆိုသည့် အချက်ကို လက်ခံနိုင်လောက်အောင် မြင်သာသည့် သက်သေခံ အထောက်အထားများ ရှိနေပြီ” ဟု ဖော်ပြထားသည်။
ပြီးခဲ့သည့် ၆ နှစ်အတွင်း စစ်အစိုးရက ဒီပဲယင်း ဖြစ်ရပ်နှင့် ပတ်သက်ပြီး ထုတ်ဖော် ပြောဆို ရေးသားခြင်း မရှိခဲ့ပေ။
ဒီပဲယင်း ဖြစ်ရပ်နှင့် ပတ်သက်ပြီး အချက် အလက်များ စုဆောင်းထားသော ပြည်ပ အခြေစိုက် မြန်မာနိုင်ငံရှေ့နေများကောင်စီက “ဒီပဲယင်း လုပ်ကြံမှုကြီးအပေါ် ထိရောက်စွာ အရေး မယူနိုင်ခဲ့သဖြင့်လည်း ပြစ်မှု ကျူးလွန်ခဲ့သူများသည် ပို၍ လက်ရဲဇက်ရဲ ဖြစ်ကာ ယနေ့ အချိန်အထိ နောက်ထပ် ပြစ်မှုကြီးများကို ဆက်တိုက် ကျူးလွန်လျက်ရှိသည်” ဟု ပြောကြားလိုက်သည်။
ရှေ့နေများ ကောင်စီက ယနေ့ ထုတ်ပြန်သည့် ကြေညာချက်တွင် ဒေါ်အောင်ဆန်းစုကြည်သည် ဒီပဲယင်း ဒေသတွင် တိုက်ခိုက်ခံရခြင်းမှာ ပထမ နစ်နာ ဆုံးရှုံးမှု၊ ထို တိုက်ခိုက်မှုအပြီး ချုပ်နှောင် ခံခဲ့ရခြင်းမှာ ဒုတိယ နစ်နာ ဆုံးရှုံးမှုဖြစ်သည်ဟု ဖော်ပြထားသည်။ “ချုပ်နှောင် ခံနေရစဉ်အတွင်း မည်သည့် ပြစ်မှုမျှ ကျူးလွန်ခြင်း မရှိပါဘဲလျှက် ရုံးတင်တရားစွဲ ခံနေရခြင်းမှာ တတိယ နစ်နာဆုံးရှုံးမှု ဖြစ်သည်”ဟု ကြေညာချက်တွင် ဖော်ပြထားသည်။
တိုက်ခိုက်ခံရပြီး ၁၁ ရက်အကြာတွင် အင်းစိန်ထောင်ရှိ ဒေါ်အောင်ဆန်းစုကြည် ထံသို့ ကုလသမဂ္ဂ သံတမန် တဦး ဖြစ်သူ မစ္စတာ ရာဇာလီ အစ္စမေးလ် ရောက်ရှိသွားသည်။ နောက်ပိုင်းတွင် မစ္စတာ ရာဇာလီနှင့် မလေးရှားကီနီ အင်တာနက် သတင်းဌာနတို့ တွေ့ဆုံ မေးမြန်းခန်း ပြုလုပ်သည့်အခါ အဆိုပါ အကြမ်းဖက် တိုက်ခိုက်မှုနှင့် ပတ်သက်သည့် ဒေါ်အောင်ဆန်းစုကြည်၏ ဆန္ဒကို သိခဲ့ရသည်။
“ဒေါ်အောင်ဆန်းစုကြည်က မေ ၃ဝ ဖြစ်ရပ်ကို လူမဆန်တဲ့ ရက်စက် ယုတ်မာမှုလို့ ပြောပြီး ဥပဒေအရ တရား အမျှတဆုံး ဆုံးဖြတ်ပေးဖို့လည်း တင်ပြ တောင်းဆိုခဲ့တယ်” ဟု မစ္စတာ ရာဇာလီက ရှင်းပြသည်။
၆ နှစ်တာ ကာလအတွင်း ထိုဖြစ်ရပ်နှင့် ပတ်သက်ပြီး ဒေါ်အောင်ဆန်းစုကြည်ထံမှ အမှာစကား ထိုတကြိမ်သာ ပေါ်ထွက်လာခဲ့ဖူးသည်။
မကြာသေးမီ ရက်များအတွင်း အင်းစိန်ထောင်ရောက် ဒေါ်အောင်ဆန်းစုကြည်ကို ရန်ကုန် အခြေစိုက် သံတမန်များ သွားရောက် တွေ့ဆုံခွင့် ရကြသည်။ သူက သံတမန်များကို ဒီပဲယင်း ဒေသ အကြမ်းဖက်မှု အကြောင်းကို လည်းကောင်း၊ လက်ရှိ ရင်ဆိုင်နေရသည့် ထောင်ဒဏ် ၅ နှစ်အထိ ကျခံရနိုင်သောအမှုနှင့် ပတ်သက်၍ လည်းကောင်း ပြောကြားခြင်း မရှိခဲ့ဟု သိရသည်။
“အမျိုးသား ပြန်လည် သင့်မြတ်ရေး အတွက် ဆန္ဒရှိကြမယ် ဆိုရင် အခွင့် အလမ်းတွေ ရှိပါသေးတယ်” ဟုသာ ဒေါ်အောင်ဆန်းစုကြည်က သံတမန်များကို ပြောဆိုလိုက်သည်။
(ဧရာဝတီသတင်းဌာန)
