ကျနော်တို့ဟာ ရန်ကုန်တိုင်း မှော်ဘီမြို့နယ် ဗိုးဒေါနကုန်း ကျေးရွာအုပ်စု သရက်ညိုရွာသားတွေ ဖြစ်ပါတယ်။ ရိုးသားစွာ လုပ်ကိုင်စားသောက်နေတဲ့ တောင်သူလယ်သမားတွေပါ။ ကျနော်တို့တွေကို နိုင်ငံတော်က စိုက်ပျိုးရေးအတွက် ချေးငွေကို ပြီးခဲ့တဲ့နှစ် မေလ ၂၆ ရက်နေ့မှာ ထုတ်ပေးခဲ့တဲ့အတွက် လယ်သမားတွေအနေနဲ့ အလွန်ပဲ ဝမ်းသာပီတိ ဖြစ်ခဲ့ရပါတယ်။
ဒါပေမဲ့ ရပ်ကွက်ဥက္ကဋ္ဌနဲ့ မြေတိုင်းဝန်ထမ်းတို့က ဘဏ်စာအုပ် လွှဲပြောင်းပြုလုပ်ပေးဖို့အတွက် လယ်သမား တဦးကို ၅၀၀၀ ကျပ်ကနေ ၃၀၀၀၀ ကျပ်အထိ အဓမ္မ ငွေတောင်းခံလို့ ပေးခဲ့ရပါသေးတယ်။
ငွေပေးခဲ့ရသူ ၁၉ ဦး ရှိပါတယ်။ အားလုံးဟာ လက်မှတ်ထိုးပြီးတော့ ဒီကိစ္စနဲ့ ပတ်သက်ပြီး နိုင်ငံတော် အကြီးအကဲဆီကို စာနဲ့ တင်ပြပြီး ဖြစ်ပါတယ်။ အခုအချိန်ထိ စုံစမ်းအရေးယူခြင်း မရှိတော့ “ငါ့ကို တိုင်မယ့် လူတွေကို ငါကတော့ ပြဿနာရှာမှာပဲ။ အထက်လူကြီးတွေကို ငါ ပိုင်တယ်။ ငါ့ကို ဘယ်သူတိုင်တိုင် ဂရုမစိုက်ဘူး။ ငါ့ကို ဘယ်လူကြီးမှ ထုတ်လို့ မရဘူး” လို့ ပြောဆိုတာတွေ ရှိနေပါတယ်။
အဲဒီလို အစိုးရက တဧကကို ၁၀၀၀၀ နှုန်း ထုတ်ပေးတာ။ ဘဏ်စာအုပ် လွှဲပေးဖို့ ငွေပြန်တောင်းတာကို မကျေနပ်လို့ နိုင်ငံတော် အကြီးအကဲဆီကို ၃ ကြိမ်တိုင် စာတိုက်ကနေ ပို့ခဲ့ပါတယ်။ စာကို ဇူလိုင်လ ၁၃ ရက်မှာ တကြိမ်၊ စက်တင်ဘာ ၂၉ ရက်မှာ တကြိမ်နဲ့ နိုဝင်ဘာ ၂၇ ရက်မှာ တကြိမ် စာပို့ခဲ့ပါတယ်။
လယ်သမားတဦး
မှော်ဘီမြို့နယ်
