ရခိုင်ပြည်နယ် စစ်တွေမြို့ အာကျိတ် တောင်ကုန်း၊ မဟာမုနိ ဗုဒ္ဓ၀ိဟာရ ကျေင်းတိုက်မှ မိဘမဲ့ကလေး တရာနီးပါးကို စစ်အစိုးရ အာဏာပိုင်များက အကြောင်းပြချက် တစုံတရာ မပေးဘဲ မကွေးတိုင်းနှင့် မန္တလေး ဒေသများသို့ ယနေ့ နံနက်ပိုင်း တွင် ခေါ်ဆောင် သွားကြောင်း စစ်တွေ ဒေသခံများ ထံမှ စုံစမ်းသိရှိရသည်။
“ဒီနေ့မနက် ၈ နာရီလောက်မှာ ကလေးတွေကို ဟိုင်းဝေးကားကြီးတွေနဲ့ခေါ်သွားပါတယ် ၊ ကလေးတွေက ဘာမသိ ညာမသိနဲ့ ပါသွားတာပါ၊ နည်းနည်းကြီးနေပြီဖြစ်တဲ့ ကလေးတွေရဲ့မျက်နှာတွေက လုံးဝစိတ်ထိခိုက်နေကြတဲ့ပုံပါ”ဟု ဒေသခံ မျက်မြင် တဦးက ဧရာဝတီသို့ ပြောသည်။
ထိုကလေးများအား ဒေသဆိုင်ရာ အာဏာပိုင်များ၊ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ စစ်တွေမြို့နယ်မိခင်နှင့် ကလေး စောင့်ရှောက်ရေး အဖွဲ့၊ မြို့နယ် အမျိုးသမီးရေးရာ အဖွဲ့၊ကြက်ခြေနီ၊ မီးသတ် စသည့် အဖွဲ့ အစည်းများက ဦးဆောင်၍ စစ်တွေမြို့မှ ကြံတိုင်းအောင်၊ တိုးရတနာ စသည့် ဟိုင်းဝေး ကားကြီးများဖြင့် တင်ဆောင် ၍ ခေါ်ဆောင်သွားကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားဌာနနှင့် နီးစပ်သူတဦးက ပြောသည်။
“ကျနော်သိတာတော့ ငါးနှစ်အောက် ကလေး ၃၈ ယောက်ကို မကွေးတိုင်း၊ မင်းဘူးပို့မယ်၊ ငါးနှစ် အထက် ၃၂ ယောက်ကို မန္တလေးကိုပို့မယ်၊ ကျန်တဲ့ကလေး တွေကိုတော့ ဆေးရုံကြီးမှာထားတယ်လို့ သိရတယ်၊ ဒီကလေးတွေကို တော့ ဘယ်ကိုပို့မယ်ဆိုတာ မသိရသေးပါဘူး”ဟု လူမှုဝန်ထမ်းဌာနနှင့် နီးစပ်သူက ရှင်းပြသည်။
အဆိုပါ ကလေးများသည် ဇူလိုင်လ၂၇ ရက်နေ့တွင် အဖမ်းခံခဲ့ရသော မဟာမုနိ ဗုဒ္ဓ၀ိဟာရ ကျောင်းတိုက်မှ ဆရာတော် ရမ္မာဝတီ အရှင်ပညာစာရ ၏ ကျောင်းတိုက်မှ မိဘမဲ့ ကလေးငယ်များဖြစ်သည်။
ဆရာတော် အရှင်ပညာစာရသည် စွပ်စွဲချက် အမျိုးမျိုးနှင့် အာဏာပိုင်များက အသင့်ရေးပြီး ယူဆောင်လာသော စာရွက် စာတမ်းများကိုဖတ်ပြပြီး ပြည်နယ်ရဲမှူးကြီး ကိုယ်တိုင် လာရောက် ဖမ်းဆီးခဲ့ကြောင်း သိရသည်။
ဆရာတော်အား ဖမ်းဆီးသွားသည့် အပြင် ကျောင်းတိုက်ရှိ ရခိုင် ရှေးဟောင်းဘုရားများ၊ စာရွက်စာတမ်းများ၊ ရှေးဟောင်း ရွှေဒင်္ဂါးများ၊ ငွေဒင်္ဂါးများ၊ ပေစာ၊ ပုရပိုက်စာများ၊ ရှေးဟောင်း ရခိုင် ယဉ်ကျေးမှု အမွေ အနှစ်များ စသည့် ပစ္စည်းများကိုပါ အာဏာပိုင်များက ယူဆောင်သွားကြကြောင်း ကျောင်းတိုက်နှင့် နီးစပ်သူများက ပြောဆိုသည်။
